AIZAWL: Revenue Minister Lalruatkima chuan nimin khan Ainawn venga sorkar quarter hlui tawh deuh leh chenna tlak tawh lo nia sawite tlawhin a endik.
He hunah hian Ainawn Local Council hotute leh Quarters' Allottee Welfare hruaitute nen Type - I, Type -III leh Type -IV te an enho a. Type - I zinga eng emaw zah chu hmanhmawh deuh a siam ngai a nih thu an sawi a ni.
Revenue Minister Lalruatkima chuan Ainawn Venga Quarters's Allottee ten Chief Minister an hmuh hnuah an harsatnate hi a rang lama ngaihven chi nia an hriat avangin hmanhmawh taka endik nghal a nih thu a sawi a. Nimina an endikna report te chu Chief Minister hnenah thlen leh a nih tur thu a sawi.
Ainawn vengah hian sorkar quarters leh mi mal chenna in eng emaw zat a awm a. Hemi chungchang hi sorkar chuan ngun takin a ngaihtuah mek niin, Revenue Department lamin ramri kham dan tur vel a teh hnuah GAD hnenah report theh lut zelin, GAD hian helai hmunhma chungchanga sorkar kal zel dan tur ruahmanna a siam dawn nia sawiin, "Tun dinhmunah hna thawh tur zinga tam zawk chu zawh a ni tawh a ni," Revenue Minister hian a ti.
Revenue Minister chuan Ainawn Veng mipui leh Local Council te chu an veng chhung hmasawn zel dan kalpui tura sorkarin hma a lak meknaah official-te hnathawh tikhaihlak lo tur te, sorkar quarter-te nek chep zawnga hna thawk lo tur leh veng dang atanga insak tum te lo khap rih turin a chah.
Tun dinhmunah Ainawn vengah hian sorkar quarter 184 awm mekin, he'ng zingah Type -I - 88, Type - II - 56, Type -III - 24 leh Type -IV - 16 a awm a ni. Phalna nei a quarter luah chhungkua 125 leh phalna nei loa quarter luah chhungkua 43 an awm a. Quarter structure a him tawk loh avanga allotment siam phal tawh loh quarters 10 leh a chhiat deuh tawh avanga allottee te'n an quarter luah lai nena an luahkawp quarter pasarihte a awm bawk.
Revenue Minister hi Aizawl West -I bialtu MLA Zothantluanga bakah Aizawl District Bawrhsap Dr Lalhriatzuali Ralte leh sorkar mi pawimawh dangte'n an tawiawm a ni.