Tun kartawpah La Liga season thar tan a ni tawh dawn a, tun nipuia an sum dinhmun avang leh player bazara an chetdan avanga sawi hlawh tak Barcelona in an player thar te an la ziak lut thei lo.
Barcelona hian sum lamah buaina nasa tak an nei mek a, La Liga in sum lama inkaihhruaina dan khauh tak a neih chu an tlin dawn a nih chuan nasa taka an insiamrem a ngai.
Hei vang hian Catalan club hian sumdawnna thilah tunhnaiah hmalakna hrang hrang an kalpui tawh a. An club in LaLiga TV rights a chan an neih atangin 15% chu an hralh tawh a. ‘Barca licensing and merchandising’ ah pawh hralh then an nei dawn.
An player thar striker Robert Lewandowski leh forward Raphinha te bakah defender pahnih Jules Kounde leh Andreas Christensen leh midfielder Franck Kessie te an ziah luh a la ngai.
Barcelona hian La Liga dan an la tlin loh avangin a thawh li na ni turin chet an tum mek a, Barca Studios commercial arm-ah ‘share’ an hralh then leh ang.
La Liga chuan hengte hi Barcelona in an kalpui hlawhtling thei a nih chuan an dan hnuaia player thar ziah luh a theih tawh turah an ngai a. A vaiin vawi leh khatah ni lovin a mal te te a ziah luh erawh an ngai mai thei nia sawi a ni thung.
An sum dinhmun avang hian Dutch midfielder Frenkie de Jong hma hun pawh a la chiang thei lova. Player chhuahtir an duh zinga tel defender Samuel Umtiti leh forward Martin Braithwaite te pawh president Joan Laporta chuan an chhuah ngei a ngaih thu a lo sawi tawh.