Zalenna hlutzia hriain, kan zalenna ni ngai pawimawh ang u
India in British awpna hnuaia zalenna a neih champha’ a hnai leh ta hle mai a. Independent ram kan nih kum 75-na tur chiah a ni bawk. He ni hi India mipuite tan chuan a hlu a, sorkar pawhin theihtawpa inbuatsaihna neiin, ropui takin a lawm thin bawk.
Mahni a ro inrel tura kan zalenna ni a nih mai bakah kumin hi a kum 75 na a ni a, kan ramah pawh in tinah hnam puanzar zar a nih theih nan hma lak niin, sorkar pawhin ngenna a siam hial a. India flag pawh mitin lei theih turin zawrh chhuah a ni bawk.
Aizawl Bawrhsap Dr Lalhriatzuali Ralte chuan India ram zalenna champha vawi 75-na lawmna chi khat atana sorkar laipui ruahmanna ‘Har Ghar Tiranga’ zawma in tinah India hnam puanzar zar theuh turin mipui a ngen a. August 13-15, 2022 chhung hian chhungkaw tinin India hnam puanzar tar theuh tura ngenin, hemi hun chhung atan hian zanah la thla loin ni 13 atang hian zar tlang tur a ni a, ni 15 tlaiah lak thlak leh tur a ni, a ti bawk.
Kan zalenna ni champha hi ngaihhlut a tul a, zalenna hlutzia hriaa zawm ngei chi pawh a ni bawk. Sorkar in ruahmanna a siam hrang hrangte mipui lam pawhin zawm thiam ila, in tina India hnam puanzar zar theuh theihna turin India hnam puanzar pawh pharh leh zar inkaihhruaina Flag Code of India, 2002 chu sorkar laipui pawhin tidanglamin, hnam puan zar chu kuta tah emaw, khawla tah emaw, cotton/ polyester/ wool/silk/khadi hmanga siam a ni ang a, hnam puanzar zarna hmun - pawnah leh mi mal inah, chhun leh zanah zar phal a ni. Sorkar laipui leh state sorkar inbuatsaihna hrang hrangte a hlawhtlin theih nan hian mipui lam pawhin thupek zawm kawngah i thangharh mawlh teh ang u.