Assam activist leh MLA Akhil Gogoi chuan a kaihhruai, Raijor Dal leh Bengal-a rorel mek, Trinamool Congress chu an inzawm thei lo tih a sawi a, BJP leh Rashtriya Swayamsevak Sangh (RSS) bei tur erawh chuan an tangdun dawn tih a sawi.
Gogoi-a hian Bengal Chief Minister Mamata Banerjee-in kum 2023-a Assam inthlana BJP paih thla tura inzawm a sawm hnu leh amah ngei pawhin inzawm thei anga a sawi hnuah Thawhtanni khan NDTV-in an kawmnaah a sawi.
“Trinamool nen hian vawi thum kan indawr tawh a, ka party, Raijor Dal nena inchhun fin kan sawi a, Trinamool Assam State Committee president atan pawh min duh,” tiin Sivasagar MLA hian a sawi.
“Keimahni chhungah kan sawiho va, thu kan la titlu thuai ang; mahse, Trinamool nen hian kan inzawm dawn a. Raijor Dal hi state khat party a ni,” a ti a. “State bil party hrang hrang erawh inzawma BJP-RSS beihho kan duh a ni,” a ti bawk.
Gogoi-a hian Assam-a assembly bial pangaa bye-election neih turah party pahnih hian tanho dan an dap mek tih a sawi bawk.
Thla 18 chhung zet UAPA dan hnuaia man a nih avanga chhuah, Gogoi-a hian Nilaini kal ta khan, “Lung in atanga ka chhuah khan Mamata Banerjee hian amah hmu turin min sawm a. Tun hnaiah vawi hnih Kolkata tlawhin kan inhmu,” a ti.
Gogoi-a hi December, 2019-a CAA duh lohna lantir lai khan man a ni.
Banerjee-i hian Trinamool nena inchhun fina kum 2024 ram pum inthlana huang zauh tura tan lak a duh.
A kawng hnai hmasa chu Assam leh Tripura a ni a, hei hi BJP rorelna ni mah se Bengali tamna a ni a. Gogoi-a leh a Raijor Dal hi thawhpuia Assam-a zuan luha hma lak a tum a ni.