Aizawl: August ni 6, 2022-a Mat luia chesual, VL.Hmangaihzuala (15) s/o Laltlanzauvi, Thenzawl Vengchhak chu nimin zing dar 7 vel khan a ruang hmuh a ni.
Kar kalta Inrinni chawhma dar 11 leh 12 inkar vel khan VL Hmangaihzuala hi a thiante nena Mat luia cheng tura an kal chu Tuichim kaiah a chesual a, VL Hmangaihzuala ruang hi a tlakna atanga kilometer hnih bawr vela hla, Chawm lei chhakah a lang chhuak a ni.
Vanduaina a thlen hnu hian Thenzawl leh a chhehvel khaw hrang hrang bakah Sairang Dinthar Branch YMA member tui thiamte nen chhun leh zan zawmin an zawng a, nimin zing dar 7 vel khan Mat lui, Serchhip Chawmkai lei bul, ngar hemna chhakah feh kal tur Serchhip tlangval pahnihte chuan ruang lang chhuak an hmu ta a ni.
Ruang hi Thenzawl Police-ten a tul anga an enfiah hnuah nimin chawhma dar 11:30 vel khan an in thlenpui niin, chawhnu dar 1 khan vui liam a ni ta a ni.