August 2, 2022 tlaia lirtheia chetsualna avanga Tlawnga chin hriat loha awm pafa, Lalfakzuala Chenkual leh Malsawmkima-te chu Mizo dana ni sarih chhung zawn a nih hnuah hmuh an la nih loh avangin a nawlpuia zawn chawlhsan a ni.
Central YMA leh Sihhmui Branch YMA kaihhruaiin nimin khan Sihhmui lei kaiah tui tla zawn kharna hun hman a ni a. He hun hi Central YMA Vice President Lalhmachhuana’n a kaihruai a, Central YMA President R Lalngheta leh Lalfakzuala Chenkual te chhungkaw aiawh bakah Sihhmui Branch YMA aiawh leh Chaltlang Lily Veng Branch YMA aiawhten thu an sawi a. Chaltlang Lily Veng Salvation Corp chuan rimawi tumin thlahna hun an hmang a. Prof Lalnuntluanga, Gen. Secy, CYMA chuan tui tla zawn hna kalpui a nih dante a sawi.
Sihhmui lei kaia tui tla zawn hna kharna hun hman a nih rual hian tui tla zawnna hmun hrang hrang - Sairang balu lakna kai, Buichali lei, Mualkhang/Khamrang, Hortoki leh Bairabi-ah te a remchan dan angin hun hman a ni bawk.
Nimin khan tui tla zawn kharna hun hman ni mah se Sihhmui, Sairang leh Sairang Dinthar chuan hmun hrang hrangah chin hriat loha awm mek, Lalfakzuala Chenkual te pafa hi zawn hna an kalpui a ni.
Mizo dana ni sarih chhung zawn tihtawp ni mah se, chhungkhat laina, thenrual tha leh thenawm khawveng chuan zawn hna hi an chhunzawm zel dawn a ni.
Tar lan tawh thin angin August 2, 2022 tlai dar 6:30 bawr vel khan mi pali chuanna, Venue car chu Sihhmui lei bul (Lengpui lam)-ah chesualin Tlawngah an tla lut a. A chuang mi pali zinga pahnihte chu chhanchhuah niin lirthei neitu, Lalfakzuala Chenkual (39) leh a fapa kum 10 mi erawh chu ni sarih zawh an nih hnuah pawh hmuh an la ni ta lo a ni.