Aizawl: Commerce & Industry Minister Dr R Lalthangliana chuan Mizoram quarry atanga lung leh balu lakte hi ram chhung mai bakah ram pawn thlenga tha tih a hlawh thu leh mamawh vetu an tam thu a sawi.
Durtlanga Government Zirtiri Residential Science College chuan nimin khan ‘Geological Soceity of Mizoram 5th General Body Meeting’ neih a ni a. He hun hmanpuitu khuallian Dr R Lalthangliana chuan geologist-te hi leilung hausakna zawngtu leh hai chhuaktu mai ni loin, Mizoram ang tlang ram leh chhengchhia, leilunga chhiatna thlen duhna hmunah chuan an pawimawhzia a hriatpui tih a sawi a. Hetih lai hian Mizoramah Geology subject-in hriat a la hlawh tawk loh thu leh a pawimawhna hretu an tlem thu a sawi.
Dr R Lalthangliana chuan khawvelin tun ang hunah a mamawh ang zela inher rem thiam a tul tih sawiin, Geology Soceity of Mizoram hmalakna hi tun atanga kum 4/5 ah chuan hma a sawn hle a beisei tih a sawi.“Sorkar nen pawh tha taka kan thawkho zel ang a, kan thawhhona a that chuan chung lamin mal min sawm ngei ang,” tiin, kalkhawm te chu Mizoramah chauh ni lo, ram pawn thlenga chhawr tlak nih tum turin a chah a ni.
Dr. J. Malsawma, President, GSM, pawhin, “Geology hi ram tan rintlak nih kan tum a, kan ni mek bawk a ni. Kan chheh vel hi oil leh gas-in a khat vek a, tiin keini'n lak chhuah kan la nei ve mang lo hi ngaihtuahna kan sen a ngaih hle a ni,” a ti.
Dr. F. Lalbiakmawia, Vice President, GSM kaihhruai inkhawmah hian khuallian Commerce & Industry Minister hian Doctorate Degree pass thar mi 10 hnenah chawimawina certificate a hlan a ni.