Commonwealth Games 2022 neih zawh taka India tan rit chawia gold medal chawi chhuaktu, Jeremy Lalrinnunga chu nimin khan Chief Minister Zoramthanga’n a pisaah kawmin hun remchang hmasa berah Jeremy leh Lalremsiami te chawimawina hun sorkarin buatsaih a tum tih a sawi.
Chief minister hian Mizoram state tê tak atanga infiamna khawvelah mi hrang hrang chawimawina dawng tham, India ram leh khawvel pum huapa mi langsar tak tak an nei thin chu lawmawm a tih thu a sawi a. Commonwealth Games-ah Mizo mi ngei, Jeremy Lalrinnunga’n gold medal a la thei chu ropui tiin a lawmpui thu a sawi a. Olympic Games thlenga hlawhtlinna a la chan ngei a duhsak thu a hlan.
Hun remchangah a Mizoram atanga Commonwealth Games 2022-a tel infiammi pahnih - Jeremy Lalrinnunga leh India tana broze medal vaw chhuaktu, India hockey player Lalremsiami te chawimawina hun sorkarin buatsaih a tum thu chief minister hian a sawi bawk.
He hun kaihruaitu, Sports Minister Robert Romawia Royte chuan Jeremy-a chu India rama an beisei san zingah a tel thu sawiin, hmabak tha tak a neih thu leh ama zarah Mizoramin hmabak êng tak a neih thu a sawi.
Jeremy Lalrinnunga hi he programme neih zawhah hian Delhi panin a kal leh nghal a ni.