Kum 1971-a India chhim lam, Tamil Nadu-a temple atanga ruk chhuah milim hlu bik tak chu New York-ah chhui luh a ni tih police-in an sawi.
Kum zabi 12-na laia Hindu pathiannu, Parvati-i lim hi Bonhams Auction House-ah hmuh a ni tih an sawi.
Bonhams hi London-a hmunpui nei, mi mal ta, khawvel huapa thil lilam thintu an ni.
Police hotu lian pakhat chuan Tamil Nadu police hnuaia Idol Wing chuan milim hi la let leh turin ‘lehkha an peih fel tawh’ tih a sawi.
Kum eng emaw zat liam ta atang khan India hian temple-a thil hlu chi ruk bo leh tawlh rukte chhui zui hna hi nasa takin a thawk.
February khan Prime Minister Narendra Modi chuan kum 2014 hnu lamah ‘thil hlu tak tak 200 chuang’ India-a an lak let thu a lo sawi tawh.
Kum 2020 khan UK pawhin bronze milim, Tamil Nadu temple atanga kum 40 chuang kal taa ruk bo chu India hnenah a lo hlan let tawh.
Tun hnaia thil hlu hmuh kir zingah Hindu pathian Shiva a lâm lai, bronze-a siam Nataraja lim pawh a tel a. Milim hi $ maktaduai 5.1 man niin kum 900 chuanga upa a ni a, National Gallery of Australia chuan kum 2008 khan a pe let.
Parvati lim hi Tamil Nadu-a mi niin police chuan kum 1971 khan Nadanapureshwarar Sivan temple atanga ruk bo niin an sawi.
Kum 2019-a temple enkawltuten police-a an thlen thar leh hnuah chhui a ni a. Idol Wing-in an bawhzui a ni.
He milim hi cm 52-a sang niin he temple atanga milim bo panga zinga mi a ni.
Police chuan $212,575 man vel niin an sawi a. Pathiannute hi dingin lallukhum kual an khum theuh a ni.
Police hian Bonhams Auction House-in an zawrh chhuah thlalak chu mi thiamte entirin a ni ngei niin an hria.
“India hi UNESCO World Heritage Convention, 1972-a tel ve a nih angin a neitu nihna chuh a ni ta a ni,” tiin police chuan an sawi.
Bonhams erawh chuan eng thuchhuah mah an la nei lo.