Wolverhampton Wanderers chuan Valencia atangin Portugal forward Goncalo Guedes chu Pound maktaduai 27.5 in an lei.
Kum 25 mi hian Molineux Stadium-ah hian kum nga daih contract a ziak a. Kum 2017 khan Paris St-Germain atanga Valencia a zawm hnuah an tan La Liga match 146 khel tawhin goal 28 a khung tawh.
Wolves hian season liamta atang tawh khan goal khung an harsat hle a. Premier League atanga tla club pathum - Burnley, Watford leh Norwich tih lova goal khung tlem ber niin goal 38 chiah an khung.
Hetiang a nih lai hian pre-season inbuatsaihnaah striker rinrawl Raul Jimenez chu a inhliam leh bawk a, hei vang hian striker an mamawhna a sang hle.
Wolves chairman Jeff Shi chuan, “Goncalo hi hun engemaw chen atanga uluk taka kan lo enthlak tawh a ni a, tunah kan lalut thei hi kan lawm hle. Talent nei tha a ni a, an ram tan bakah Europe hmun hrang hrangahte a lo che tha tawh thin. Premier League pawh a mil dawn hle in kan hria.” a ti.
Winger leh a tul dan anga striker a khel thei Guedes hian Portugal tan vawi 32 khelin goal 7 a khung tawh.