Ramri chungchangah remna awm zel rawh se
Ramri chungchanga Assam leh Mizoram minister te inbiaknaah lungawina tur leh kut han ben hluaina tur awmin a lang lo a, thu dahsa zawm leh tihhlawhtlin kawnga ke la pen chhunzawm zel tha an tih thu an sawi bakah October thlaah Guwahati-a inbiak leh nise an ti bawk.
State pahnih inkarah inrintawkna a awm theihna tura inbiakna nei tura Mizorama kalte hi Assam sorkar Border Protection & Development Minister Atul Bohra, Housing & Urban Affairs & Irrigation Minister Ashok Singhal te bakah anmahni tawiawmtu, Border Protection & Development hotu pahnihte an ni.
Thu danglam em em han sawi a awm lo a, thu dahsa tihhlawhtlinna an nei leh mai chauh tite pawhin a sawi theih ang! Mahse, inremna nei tura inbiakna neih erawh a tha a, inremna dawhkan kil chunga thlamuang taka inbiakna a awm thei hrim hrim erawh lawmawm tak a ni.
Kan hriat angin kan ramri hi fel nghal mai thei niin a lang lo a, vawilehkhata chinfel nghal mai thei pawh a ni lo bawk. Chutihrual erawh chuan sorkar hian kan dinhmun hrerengin khauh takin ramri humhalh hna thawk reng se la, a khat tawkin tlawh fo thei thin bawk se a tha hle.
Ramri chungchanga buaina kan tawh fo loh nan inremna awm zel thei se la, mipuite pawhin kan ram humhalh kan duhzia hriain sorkar in theihtawp chhuah zel bawk teh se.