French football club Olympique de Marseille chuan Chilean forward Alexis Sanchez chu kum hnih contract an ziahpui.
Sanchez hian Thawhtanni khan Inter Milan a contract a neih chu club nen inremna siamin an titawp a. Nilainikhan French club-ah hian medical a neih fel hnuah contract a ziak.
Kum 33 mi hi Inter Milan a chhuahsan fel hma in Marseille pan tura ngaih a ni tawh.
Kum 2019 khan Inter Milan hi Manchester United atangin loan a a zawm phawt hnuah a nghetin Italy a vawi 19 champion tawh hian an lalut a. An tan match 109 khelin goal 20 a khung.
Kum 2020-21 sdeason a Inter in Serie A title an chawi tumin player tangkai zingah a tel a, goal sarih a khung. Mahse hemi hnuah hian first XI-ah hmun a chang tam lo.
Copa America vawi hnih chawi tawh Sanchez hian ram tan vawi 148 khelin goal 48 a khung tawh.