Aizawl: Mizoram Pradesh Congress Committee (MPCC) President Lalsawta chuan political party-a awm ve loten ram tluchhe tur an vei zawk chu chona a tlin thu leh ram veitu an pun tak viau chuan ram vei a lo tul tawh tih a sawi.
Hyve Aizawl City Hall-a nimina Congress thalai, MPYCC-in intuaitharna hun an buatsaih a hmanpuinaah thu sawiin MPCC President Lalsawta hian, “Vawiinah hian kan ram tluchhe tur hi keini ai mahin political party-a awm ve loten an vei zawk tih hi chona a tling a ni. Politics-a awmte aia ram veitu an lo pun tak viau chuan vei a lo tul hle a ni, vei loh chi pawh a ni lo,” a ti.
“Ram roreltu nikhua loah hi chuan ram a him lo a ni. Nangni thalai rualte hi chuan, ‘Thluaka sum lut ka vei ve lo ang, ka kutah chuan sum a him ang,’ in tih tlat chuan Mizoram kan siam tha thei a ni, tih takzeta kan tih chuan,” tiin Congress thalai hruaitute chu ram siam tha turin theihna an nei tawk niin Lalsawta hian a sawi bawk.
Congress Thalai President Dr Lalmalsawma Nghaka pawhin thu sawiin Congress thalaite phur taka an la awm chhan chu sorkar tha siam an tum tlat vang a ni tih a sawi a. Congress sorkar liam taah khan thil tha tam tak an tih laiin, tih dik loh leh tih fuh tawk loh tam tak an neihte chu huaisen takin an insiam tha zel dawn niin a sawi a. Sorkar tha an siam theihna tura kohhran rawngbawltu te, sorkar hnathawk te, Mizoram vei tak tak mipui te, Mizoram party hrang hranga ram vei leh sorkar tha duhtu te thurawn leh finchhuahna thu dawng tura an inhawn reng thu a sawi.