Bangladesh sorkarkar leh tanpuitu pawlte chuan Rohingya raltlante chu coronavirus laka invenna damdawi an pe tan ta.
Tun hnaiah Myanmar atanga tlanchhiaa camp chhe taka awm raltlante hi an hriselna a him tawk lo hle tih sawi a awm nasa a. Hemi karah hian hripui laka an himna tura hma lak a ni ta a ni.
Bangladesh-ah hian hri inkai darh awl em em, Delta variant chu nasa takin a leng a, an ram chhim lama Cox’s Bazar district an tih, Myanmar nena an inrina, Rohingya raltlante camp 34 awmna hmunah chuan mi 20,000 chuangin kai tawhin mi 200 vel an thi tawh.
International Federation of Red Cross & Red Crescent Societies chuan hri kai leh kai lo endik zinga 30% chuangin hri an kai thin tih an sawi a, a bikin camp-a awmte zingah a darh nasa hle tih an sawi.
Bangladesh-ah hian mi maktaduai 1.3 chuangin hri leng hi an kai tawh a, mi 22,897-in COVID-19 an thihpui tawh bawk.
Buddhist ram, Myanmar atang hian kum 2017 khan sipaiten Rohingya helho beih chhuanlamah an hnam hi an bei vak a. Mi 7,00,000 velin an ram chhuahsanin an thenawm ram hi an pan.
Rohingya dangte hi a hma lama tihduhdahna avang thovin Bangladesh-ah tlanchhiain refugee camp-ah an awm.
Kum 2017-a sipaiten an hnam an beih tum khan pawngsual, thah leh chenna in tam tak halsak an ni a. Mihring dikna chanvo humhalhtute leh United Nations chuan ‘hnam suat tumna’ tiin a sawi hial.
Hetih lai hian Bangladesh leh Myanmar hian raltlante inpek kir dan an dap ve reng a; mahse, Rohingya tam zawk chuan an rama kir leh an hlau.