Aizawl: Ram pum huapa AIDS control hnathawktuten an hlawh bi siam that an duh lohzia lantir nan nimin khan lungawi lohna an lantir a, Mizoram State AIDS Control Society (MSACS) hnuaia thawktute pawhin an zawm ve.
MSACS Staff Welfare Committee thuchhuakin a tar lan danin, an hlawh hi October, 2013 khan ennawna siam that a lo ni tawh a, hlawh bi siam thatsak leh tur hian an nawr reng a, kum riat hnuah August 3, 2022 khan NACO chuan hlawhbi thar a siamsak leh ta a ni.
He an hlawhbi thar hi tun lai ni tin mamawh chakkhai man pung zel nen a beitham hle tih an thuchhuahah chuan sawiin, kum nga aia rei lo thawk thawhte ngaihsak an ni miah lote leh tawnhriat nei ngah zawk thawktute ngaihsak miah lova NACO-in hlawh bi a siam chu an ngaihdan a ni lo hle tih an sawi.
Hemi chungchangah hian India ram pum huap AIDS control hnathawktute chuan nimin khan an hnathawhna hmunah lungawi lohna an lantir angin Mizoram district hrang hrangah pawh an lo zawm ve a, vawiinah ram pum huap leh state aiawh thlan chhuah te leh NACO leh Union Ministry for Health & Family Welfare aiawh inbiaknain rah tha a chhuah lo a nih chuan tiamchin awm lova nawrhna buatsaih an tum a; HIV/AIDS lam kaihhnawih hna reng reng thawh a ni lo vang tih sawiin, he an lungawi lohna lantir vanga mipui tawrhna tur awm theite an chah lawk tih an sawi.
NACO hnuaiah hian ram puma district damdawi in, thingtlanga CHC leh PHC bakah medical college hnuaiahte State AIDS Control hnathawktu mi 2,5000 bawr vel an awm mek a, Covid-19 leng, ram puma a hluar lai pawhin he lamah hian nasa takin an thawk tel bawk a, he hripui vang hian eng emaw zat nunna chân an awm hial tih AIDS control programme-a thawktute chuan an sawi a ni.