Aizawl : C. Lalhluna lehkhabu buatsaih ‘Mizoram thing leh mau, nungchate humhalhtu ropui VL Bela (The great conservator of flora and fauna of Mizoram)’ tih chu nimin khan Forest Minister TJ. Lalnuntluanga’n a tlangzarh.
EF&CC Minister chuan SSU hruaitu a lo nih tawh țhin thu sawiin, SSU Founder President lehkhabu ziak tlangzarh tu a ni chu lawmawm a tih thu a sawi a. Leh- khabu hmingputu VL Bela chu “Zoram leh Zofate tana thawhhlawk leh hlu tak, tlawmngai, rual pawl thiam leh hawihhawm tak a ni” tiin, Mizorama ramhmul dam- dawite pawh hmang tangkai em em thintu a nih thu a sawi.
TJ Lalnuntluanga chuan Mizoram Consultative Forum (MCU) hruaitu VL Bela hovin kum 2002 atangin thing leh mau leh nungchate humhalhna Zotheihuan kalpui a nih thu a sawi a. “Mizoram hnum hrang hrangah Zotheihuan chu din a ni tawh” a ti.
VL Bela chu entawn tlak, taima leh midangte phut lova a hmaa awm te thawk țhin a nih thu TJ Lalnuntluanga chuan sawiin, hmangaihna ngah, pharte pawh lungtenna nei lova enkawl tawh țhin a nih thu a sawi a. Rethei leh chhumchhiate tana a luanchhuah tawh țhin dante, nungcha, thing leh mau humhalh kawnga ke a pen dante chhuanawm a tih thu a sawi bawk.
Lehkhabu buatsaihtu C. Lalhluna chuan nungcha, thing leh maute venhim kawnga VL Bela thawhrimna leh ramin remna leh muanna a neih theihna tura a thawhhlawk zia țhang thar ten an hriat a duh avanga lehkhabu chu buatsaih a nih thu a sawi bawk a ni.