Aizawl: Mizoram Intodelhna Project (MIP) anga hmasawnpui tham ni mang si loa MNF sorkar chu SEDP sum semchhuah tumah puhin, an intiam anga SEDP sum Rs 3,00,000 sem turin Mizoram sorkar an phut tih Mizoram Pradesh Youth Congress Commitee (MPYCC)-in an sawi.
An thuchhuahah Congress Thalai hian hun rei tak atang tawha mipuiin an nghahhlelh, sorkar term tawp dawn hnaia SEDP hawnna hun hmanga sem tan tum a ni chu a dawngtu turte an lawmpui thu leh chhungkua, ram leh hnam hmasawn nana hmang vek turin duhsakna an hlan tih an sawi.
Hetih rual hian MNF party hnenah, ‘cheng nuaih thum aia tlem lo min pe ru kan ti reng reng lo a,’ MNF party hian, ‘kan sorkar chuan cheng nuai thum aia tlem lo kan pe vek dawn che u,’ tia intiamna zawk a nih thu sawiin, “Chuvangin, cheng nuaih thum aia tlem lo tiamtuten cheng sing nga SEDP-ah sem an tum a, 1st installment a cheng singhnih sangnga pek an tum ta mai hian an intiamnaa an din lohzia leh Mizoram mipui min hmuhsitzia a tilang chiang hle a ni,” an ti.
MPYCC hian MNF party-in an sorkar hmasaka MIP Project a lo kalpui tawh anga cheng singthum pek tumin, cheng sang sarih a sem ang vela hmasawnpui tham ni mang si lo, sum semchhuah a tum hi tha lo an tih thu an sawi.
MPCC President Lalsawta kaihhruaina hnuaiah an tho chhuak leh mek a, Mizoram mipuite tan sorkar tha siam ngei tura an inbuatsaih mek thu an sawi bawk.