Serie A champion lai AC Milan chelhin an awm a, Pathianni zanah Atalanta laka an si phurh sut ngaiin an mamawh goal an khung thei hram a, 1-1 in an inhnehtawk.
Stadio Atleti Azzurri d’Italia-ah team pahnih an inthlau lo hle a. Minute 29-naah Atalanta midfielder Ruslan Malinovskyi chuan goal khungin penalty area hmawr atangin a ke veilam in a pet lut mawi.
He goal hi second half-ah Milan in an chhanglet a, minute 68-naah an midfielder Ismael Bennacer chuan Alexis Saelemaekers corner pet luh atangin an si phurh a sut.
Ball chang tam zawk Milan in inkhel tawp thlengin goal hlauhawm nei hnem zawk mahse goal an khung belh thei lo.
Bennacer chuan, “Chak thei kan ni a, kha aia tha zawka khel tur kha kan ni. Atalanta kha an tawm tlat avangin hmunawl han hmuh tur a vang hle.” tiin inkhel zawhah a sawi a.
Atalanta midfielder Mario Pasalic chuan, “Italy champion kan hmachhawn a, point khat an laka kan hmu thei hi a lungawithlak. Team tha berte lakah pawh kan chhe bik lo tih hi kan lo lantir fo tawh a, hmalam kan pan zel a tul.” a ti.
Inkhel dangah Napoli in Monza an mikhual a, Khvicha Kvaratskhelia chuan goal hnih khungin 4-0 in an chak.