Indian Bureau of Mines (IBM) chuan Topcem Cement siam chhuaktute hnenah chinai lung an laih chhuahna, South Khliehjri mine, Meghalaya chuan dan a bawhchhe leh tih an hriattir nawn leh a. An dan zam an zawm lo a nih chuan kharsak hial an ni ang.
IMB-a Assistant Controller of Mines Vikash Kumar chuan February 4 khan Topcem Cement-in chinai lung an lak chhuahna ber hmunah dan zawm a ni lo tih leh zawm tura tihna chu Meghalaya Cements Ltd chairman Kailash Chandra Lohia hnenah a lo thawn tawh.
IBM thuneitute hian December 15, 2020 pawh khan East Jaintia hills district, Thangskai bula South Khliehjri limestone mine hi a hmunah an lo endik tawh.
An endik hnuah hian Topcem Cement hian Mineral Conservation & Development Rules, 2017 Rule 11 (1) an bawhchhia tih an sawi.
IBM-in Lohia hnenah hriattirna an thawnah hian dan an bawhchhia a nih chuan hremna hi Mineral Conservation & Development Rules, 2017 Rule 62 anga kalpui a nih tur thu an hriattir nghal.
Rule 62 hi kum hnih thleng lung tan emaw, Rs Nuai 5 thleng chawi emaw theihna a ni a. An ti zui zel a nih chuan Rs 50,000 zel ni tin chawi belhtir theihna a ni.