Bangladesh chuan electric an tlakchham avangin chawlhkar khatah ni khat sikul an khar belh dawn a, pisa kai hun chhung pawh an titawi dawn tih sorkar thuneituin a sawi.
Asia chhimchhak lam ram hian thla hmasa atang khan ni tin darkar hnih power tihtawp an lo kalpui tawh bawk.
An ram mipuite chuan sorkarin petrol man 50% chuanga a tihsan duh lohna nasa takin tun hnaiah an lantir bawk.
Ukraine-a indona awm mek avangin Bangladesh hian tuialhthei an lak luhna man a to sawt a, an ram economy leh foreign currency reserve an neih tawp a phai chak hle.
Thawhtanni khan Bangladesh Cabinet Secretary Khandker Anwarul Islam chuan Zirtawpni chauhva khar thin sikulte chu Inrinniah pawh chawlhtir an ni dawn tih a sawi.
Dan pangngaiah chuan Bangladesh-ah hian chawlhkar khatah ni ruk an hawng thin.
Hetih lai hian sorkar pisa leh bank-te pawh ni khata darkar riat inhawng thin chu darkar sarihah a pawt tawi dawn bawk a. Mi mal pisate pawh power renchem zawnga inhawng turin an ti bawk tih Islam chuan a sawi.
Thingtlang khuaa power pek an titawp dawn lo va, a bikin zing lam, thlai tui pek hun lai bik phei chuan an pe ziah dawn niin a sawi.
Bangladesh-ah hian an ram hmun tam zawk chu ni tin darkar hnih tal electric neih lo ziah an ni.
An ram hian electric hi natural gas atangin an siam ber a, tlem chawk luh an nei ve bawk.
Thuneitute chuan tuialhthei lak luhna man a to avangin diesel hmang power plant zawng zawng an chawlhtir vek tih an sawi a, hei hi Bangladesh-in electric an siam chhuah 6% vel a ni.
Tun thla tirah khan sorkar chuan petrol man hi 50% chuanga tipungin litre-a taka 86-a an lei thin chu taka 130 a ni tawh.
Diesel leh khawnvartui man pawh 40% chuangin an tito bawk.
July thla khan Bangladesh hian International Monetary Fund (IMF) atangin pawisa puk a dil a, Asia chhimchhak ram zinga a pathumna niin Sri Lanka leh Pakistan hnung a zui.
Loan lak a dil hi October thlaa World Bank leh IMF Spring meeting-ah ngaihtuah a ni dawn.
Foreign currency reserve an neih pawh $ tluklehdingawn 40 velah a tlahniam tawh a, hei hi sorkarin sum a hman thin thla li leh a chanve vel daih chauh a ni tawh.
Tun hnai kum eng emaw zat chhung khan sum hi $ tluklehdingawn 416 zet nei hmanin khawvela economy thang chak ber tia fak hlawh thin a ni.