Telangana BJP MLA T Raja Singh chu Thawhlehni khan Prophet Muhammad-a chungchang a sawi bawrhbanga puh a nih avangin man a ni a. Saffron party pawhin man a nih hnuah hian an party atangin an suspend nghal.
Thawhtanni zan khan a thil sawi nia an puh duh lohna hi Hyderabad khawpuiah lantir niin a chungah na taka action lak an phut.
Singh-a lakah hian Indian Penal Code section hrang hrang tlawhchhanin thubuai ziah luh a ni a. Police chuan sakhuana behchhana pawl dang beihna thu sawi te, mi dang rinna leh rin dan kawng sawihnawm leh thil sual dang ti tura mi dangte hmintu tia thubuai siamsak a ni tih an sawi.
Thawhtanni zan khan City Police Commissioner CV Anand-a pisa tual leh Hyderabad khawpui hmun dangah a thil sawi duh lohna hi lantir a ni a. All India Majlis-e-Ittehadul Muslimeen (AIMIM) MLA leh Greater Hyderabad Municipal Corporation-a corporator eng emaw zat chuan duh lohna lantirna hmuna police station panin Singh-a laka hremna lekkawh ngei an phut tih an thlen.
“Nupur Sharma-i thiltihah duhtawk mai lovin an official policy a ni der dawn ta a, tunah MLA dangin thil a sawi leh ta em ni? Mipui an thinrim a, an mittui a tla a. Engvangin nge Prophet Muhammad-a chungchang hi an sawi leh thin? Kan phut chu hetiang hi BJP-in a tihtawp vek a ni. Mipuiten Prophet in huatna an hmu tam tawk tawh,” tiin AIMIM chief Asaduddin Owaisi chuan a sawi.
Singh-a’n Prophet chungchang a sawi hi thla rei vak lo liam taa BJP thupuangtu, Sharma-i’n hetiang lam bawk a sawi avanga thinrimna nasa tak a thlen hnu lawkah a ni a. Sharma-i hi party-in an suspend a, a lakah thubuai 10 vel ziah luh a awm mek bawk.