Aizawl: Mizoram Pradesh Congress Committee (MPCC) Vice President Lal Thanzara chuan an party-ah haw rûnpui a thleng mek tih sawiin, kohhran mittlung takin inthlan an hmachhawn dawn tih a sawi.
MPCC Campaign Committee ruahman angin Thawhlehnia East Tuipui North Block huam chhung khaw hrang a tlawhnaah thu sawiin Lal Thanzara hian Congress party kalphung a danglam dawn tih a sawi.
“Congress party inbuatsaih thar zelah hian inthlan kan hmachhawn dan pawh nasa takin a danglam tawh dawn. Kohhran mittlung takin inthlan kan hmachhawn dawn a. Pu Lalsawta’n ‘That Loh Theih Lohna Bawm’ hmangin min hruai dawn. Tuna chief minister tura atana mi duh rawn ber leh rinhlawh, Pu Lalsawta hmanga Pathianin min buatsaihna dan hi kan lawm hle a ni,” a ti.
Lal Thanzara hian Congress-ah haw rûnpui a thleng mek tih sawiin, tunah hian mi thiamte nen ram mipui leh ram tana tha ber turin policy uluk takin an duang mek tih a sawi.
Mi taimate tanpuina tur, ‘Tang Puihna’ an kalpui dawn tih sawiin, “Pu Lalsawta ho hian sorkar hrim hrim kan tum a ni lo; Mizoram mipui tana sorkar tha (good governance), that loh theih lohna bawm dina mipui rilru siam that hi kan tum a ni,” a ti a; candidate tur mi tha tak tak Pathianin a pe dawn niin a sawi.
MNF party chungchang sawiin MPCC vice president hian, “Kan sorkar hrawn mek hian Mizoram mipui sum nasa takin an suasam a, MNF sorkarah mi retheiten chanvo an nei ve lo. Mi pangngai rin an hlawh tawh lo. An mang a ang a, sum enkawl thiam loh vanga leiba tam tak rulhna atan mi dang pawisa puk chhawn leh ngaiin min siam mek a ni,” a ti.
ZPM chungchang sawi bawkin, “Miin an hriatchian loh avang hian tha emaw an ti thin; mahse, an hriatchian hunah chuan an rilru a na dawn. Mi dang aia tha leh danglam zawk anga inzuar, an thusawi bawhchhiaa hlawkna awm thei thei pawisa loa engkim duh ve vek an ni,” a ti bawk.