AS Roma in match hnih atang a vawi hnih nan hnehna an chang a, Cremonese lakah 1-0 a an chak zanah erawh an lawm a kim vek lo.
Thawhtanni zanah Stadio Olimpico-ah Roma in an mikhualte hi defender Chris Smalling goal khung hmangin an hneh.
Nimahsela player inhliam an neih belh avangin an tan lawm a kim lova. Midfielder thar Georginio Wijnaldum chu training ah a ke ruh a tih tliah avangin an chan tawh a. Ani bakah an midfielder rinrawl Nicolo Zaniolo chu inhliam avangin a inkhel zo thei lo.
Inkhel pumpuiah Roma an langsar a, goal hlauhawm vawi 27 an insiam a. Mahse khung thei thin lo in minute 65-naah Smalling-a’n Lorenzo Pellegrini corner chu a tauh lut a, goal awmchhun a khung.
Inkhel zawhah Smalling chuan, “Point thum a pawimawh ber a, mahse a inkhel thlir chuan kha aia tha khan kan khel thei chiang a. Kan inkhel thlirin hma taka inkhel kha dahtha thei kan ni. Mahse khelh hnih atang point 6 kan hmu a, hma kan sawn zelna turin bul kan tan tha.” a ti.
An inhliam chungchang sawi zuiin, “Gini inhliam pawh kan ti tlang hle. Training a rawn zawm hnuah a phur hle a, kan team-ah mi thar a ni chungin a mikhual lo hman tawh hle. A lo kir leh thuai ka beisei.” a ti bawk.