Nau chunga thi, Hortoki nu, Tebawihi thih chhana inpuhna hrang hrang a awm karah CHA thuneitute chuan thawktute inthlahdahna vanga thleng ni awma an hriat loh thu an sawi.
The Zozam Times-in a kawmnaah CHA Medical Superintendent Dr Zoramthanga chuan an damdawi ina nau nei tura admit, Tebawihi a thi chu hrehawm an ti hle tih sawiin, lusun chhungte an tawrhpui tak zet tih a sawi.
He thihna thleng chungchangah hian damdawi ina thawktute inthlahdahna vanga puh ni mah se, an han chhui chianna erawh thawktuten an tih tur an tih loh leh an inthlahdah vanga thleng ta a nihna awm an hriat loh thu Dr Zoramthanga chuan sawiin, “Thawktuten an ngaihsak tha viau asin,” a ti.
Thuthang thenkhat a dik lo tih CHA medical superintendent chuan sawi bawkin, hemi hun lai hian doctor pahnih, specialist leh specialist zirlai an awm a, nau chhar ngai an awm deuh reng avangin nurse duty-te pawh an muhil lo tih sawiin, Tebawihi’n taksa lama harsatna a neiha a nat buaiah pawh nurse-ten an buaipui nghal vat tih a sawi.
Hortoki nu boral chhan hi han puh fak tur an hre lo a, an thih chhanah finfiahna tura hmalakna a awm lo tih sawi bawkin, “Ruang lak chhuah a nih dawn khan sister-ten postmortem a duh leh duh loh an zawh pawhin a tul an tih loh thuin an chhang,” a ti.
Thihna a thlen hnua a ruang an lak chhuah dawn pawh khan lusun chhungte hian lungawi lohna an nei awm an hriat loh thu sawiin, “Lungawi lohna an neih kan hre lo a, khami zan khan awmpuitu pahnih an neih zinga pakhat kha ward atangin chhuahtir a ni a, kha kha lawm lohna chhan tur deuh chu a ni mai a, khami chungchangah pawh khan complaint an nei lo,” tiin a sawi.
Hetianga an damdawi ina sawi kai thei tur thihna thleng chu pawi an tih thu leh hrehawm an tih thu a sawi bawkin, lusun chhungte nena a incho zawng emaw, a inchhang kual zawng emawa hmalak chu an duh dan a ni lo tiin, chutihrual chuan thuthang dik lo tak tak awm erawh pawi an tih thu a sawi bawk a ni.