Aizawl : MPCC PAC member KS Thanga’n “Kan tih loh tur zu kan zawrh avanga Congress sorkar kha tla ta kan ni” a ti.
Champhai South block Congress committee extended meeting nimina neih a telpuinaah he thu hi KS Thanga chuan a sawi a. “Kan tihsual zia kan hria a, Zoram mipuite leh Pathian rawngbawltute ngaihdam kan dil a ni, zu kan zuar nawn tawh dawn lo,” a ti.
Congres sorkar laiin opposition party ten eirukna leh rorelna ṭha lo chungchangah sorkar beihna tur an hre lo niin KS Thanga chuan a sawi a. Congress party chuan miretheite tan ngaihtuahna an seng nasa thin nia sawiin, “Central lamah project siamin NLUP-ah vbc 2,871 min pawmpui a, state budget chengkhat pawh pawthek lovin miretheite tan kan luang chhuak” a ti.
KS Thanga chuan “MNF sorkar leh Congress sorkar kha tehkhin zahthlak khawpin a inṭhathleih” a ti a. MNF chu la rei lo hle mahse, Mizoram an sawp chhe nasa hman hle nia sawiin, Mizo mipui thinlung an ti nain mipuiin Congress sorkar an ngai niin a sawi a. Congress party an pan khawm leh mek niin a sawi.
Congress ministry-a Parliamentary secy i/c Finance lo ni tawh KS Thanga chuan, “Pu Lalsawta nen Finance kan chan ve chhungin theihtawp kan chhuah a, sorkar hnathawkte tan kumtin GP fund-ah vbc 500 aṭanga 600 vel kan pe chhuak ve thei” a ti a. “Sorkar hnathawk hlawh batsak lovin a hun takah kan pe ṭhin” tiin “Pu Lalsawta thiamna leh finna a zar ah Congress sorkar khan vbc 700 chuang kan hnua sorkar te kan hnutchhiah thei a, hmasawnna hna tam tak NEDP aṭang pawhin kan thawk thei a ni” a ti bawk.