Aizawl : Taitesena group YMA leh Langkaih group YMA-in an din, Kuhva chingtute harsatna zirchiangtu tur study team-in Mizorama Kuhva chingtute harsatna chungchanga Mizoram sorkar aiawh – Mamit Bawrhsap, Kolasib Bawrhsap leh Assam sorkar aiawh Cachar Bawrhsap, Hailakandi Bawrhsap leh Karimganj Bawrhsap te inbiakna turah nimin khan Mamit Bawrhsap Lalnunhlua hnenah rawtna leh an duh dan te an thlen.
Study team chuan Hachhek biala Kuhva tharte chu India khua leh tui diktak kuthnathawktute thar a nih thu leh Assam lama Kuhva-a sumdawngte hnenah tunhma atanga harsatna awm lova hralh thin a nih thu Bawrhsap hnenah chuan an thlen a. Tunhnaiah Burma Kuhva dan lova lakluhin harsatna a siamsak thu leh Assam lamin Burma Kuhva dan lova lakluh Assam-a lut leh kaltlang thin chu titawp tura khauh taka hma a lak thu thlenin, hei hian Hachhek a Kuhva thar te hralhna a tipingin, Kuhva chingtute harsat na a siamsak nasa hle tih niin an sawi.
Phai lama Kuhva sumdawng liante nena sawihona eng atanga GST 0% (Nil GST Bill) siama, sorkar aiawhin Kawrthah SDO (Civil) leh Taitesena leh Langkaih Jt. group YMA hriatpuina kaltlanga hralh a nih theihna tura hma laksak turin Study team chuan Mamit Bawrhsap chuan an ngen a. “He Nil GST bill hian Mizoram thar ngei a ni tih a finfiah ang a, Burma Kuhva ro dan lova lakluh hi sawngbawl tawh a nih avangin Nil GST bill siam a thiang lova, kum 2022 chhung chauh inremna ni lovin Assam leh Mizoram sorkar hian ramchhung kuthnathawktute dikna chanvo humhalha, Kuhva chingtute hre rengin kum tam tak hman theih tur inremna felfai tak siam theih ni se” an ti bawk.
Study team chuan “Hachhek biala Kuhva tharte chu India khua leh tui kan nih anga zalen taka kan hralh theih nan Assam sorkar leh Mizoram sorkarin ruahmanna siam thuai se kan duh hle” an ti a. Ram chhung kuthnathawktute himna ngaihtuah chunga, ramdang nena insumdawntawnna leh bungraw lakluhna dan awmsa chu state pahnihin kengkawh zel turin an phut bawk a ni.