Season bul an tan chhiat em avanga talbuai Manchester United in an mualah an hmelma Liverpool an hneh a, 2-1 a chakin beiseina thawm ring nen hmalam an thlir.
Manchester United in an mualah nidang zawnga an tih ngai loh angin football an khel a, chak duhna thinlung leh taihmakna lantirin Liverpool an hneh a. Manager thar Erik ten Hag-a hnuaiah a vawikhat nan Premier League-ah an chak.
Old Trafford-ah United player te an tlan taima zawk a, inkhelah chan tha zawk chang theiin an inpekna avangin an fans te thawm a ring a. 2-1 in hnehna an chang.
Manager thar a huai
United in a chhe thei ang berin season bul an tan a, insiamthat an mamawh tih an inhria. Manager thar in captain Harry Maguire leh star player Cristiano Ronaldo te bul tantu zingah a telh lova, team a thlak kual.
A thutlukna erawh a fuh tih inkhel tan tir atangin a lang nghal a. Lehlamah season bul tan tha bik lo Liverpool in chak hmel an la hmu thei lo.
A tir minute 30 chhungin United an tlan hnem a, ball inchuh leh ball per lakah Liverpool in an tluk lo. Ball inpek kual a thunun an tum lova, amaherawhchu ball an chan in awmze neiin an hmang fo.
Liverpool tlarhnungah goal ven lama sel tawk leh thin Trent Alexander-Arnold an bitum a. Anthony Elanga leh United forward dangten a hnung a hmunawl atangin hlauhawm an siam fo.
Elanga hian goal ban a pet per hnu lawkah minute 16-naah Jadon Sancho chuan United goal hmahruai a khung a. First half a chance nei tam zawk chu United an ni a. Tlarhnungah erawh defender Lisandro Martinez-a’n Bruno Fernandes-a mualpho tur a hliahkhuh.
Second half-ah Marcus Rashford chuan an goal hnihna minute 53-naah a khung a. United hian counter-attack an khelh tawh avangin Liverpool tan hmunawl hmuh tam a har tawh a. Huntawp dawn lamah Mohamed Salah goal khung avang erawhin a tawp boruak a tang.
Liverpool an buai ve tho
Jurgen Klopp-a pawlten khelh thum atang point sarih an hloh tawh a. Inhliam in an squad a tibuai bawk. Chutihrualin an match thum khelh tawhah anni aiin an khingpuite zawk zel an hriam a. Hei hi an tan buaina a tling.
United player zawng zawngin thih tha a ball an chuh laiin kum upa tawh James Milner leh captain Jordan Henderson ten inkhel an kaihruai thei lova. Fit chiang lo Fabinho dah luh a nih hnuah Liverpool an zia.
Tlarhnungah pawh Reds an nghet lova. Alexander-Arnold lansarh dan a duhawm lova, a laiah Fulham laka mualpho tawh Virgil van Dijk chu United goal hmasa zawkah sawisel a hlawh hle.
Game 35 a awm a, Liverpool in khelhdan nghet, player tha leh coach ropui an nei. Mangan hun a la ni lo, chutihrualin an team tha leh hmasawn tamna Premier League-ah hun khawhral theih a ni lo.
Inkhel zawh lam
Manchester United boss Erik ten Hag chuan, “Tactic lam duhtawkin sawi mah ila a pawimawh chu inpekna rilru a ni. Zaninah khelmual chhungah rilru khat pu in kan tangrual a. Hnehna kan sualchhuak a, kan thiltih apiangah kan inman a, kan tangrual.”
“Kan rilru puthmang thlak a, inkhel hmachhawn dawn pawh thlak ka duh a, zaninah kan hmu a. Hei hi a bul tanna chauh a ni.” a ti.
Liverpool boss Jurgen Klopp chuan, “A tir atangin an rilru puthmang a hriat a, a awlsam dawn lo tih a hriat nghal. Goal an khung hnuah kan duhdan in kan inkhel thei a, vanduai chang erawh kan nei a, United ang lakah chuan a pawi thin. Goal hnihna a luh hnuah erawh a harsa tawh hle.” tiin a sawi ve bawk.