Aizawl: Mizoram Police chuan nimin khan Mizoram Home Guards & Civil Defence (MRHG&CD) hnenah silai 300 leh a mu thahnem tak a hlan a, he huna hmanpuitu, Home Minister Lalchamliana chuan Mizoram Police-in silai leh ralthuam a tha thei ang ber nei se tih chu a duhthusam a nih thu a sawi.
Silai leh a mu inhlanna certificate-ah hian hian hriatpuituah home minister-in hming ziakin Mizoram Police aiawhin IGP (Hqrs) John Neihlaia’n hminga ziak a, Mizoram Home Guards & Civil Defence (MRHG&CD) aiawhin Maj. Zosangliana Hualngo, Commandant General-cum-Director, MRHG&CD-in hming a ziak thung a ni.
Lalchamliana chuan an phak tawkah ralthuam leh hmanraw tha neih a pawimawh a, Mizoram Police pawh hian silai leh ralthuam a tha thei ang ber nei se tih chu a duhthusam a nih thu sawiin, “A theih chin chinah hma kan la zel bawk a ni,” a ti.
MRHG-ah hian a ngheta thawk 200 an awm tling lo va, volunteer-te nen 1,000 bawrvel an awm a, India ram state tinah an dinhmun hian duhthu a la sam lo hle tih sawiin, tunah pawh hian MRHG volunteer tur mi 11 chuang zet lak belh an dil mek tih a sawi.
Mizoram Police-in MRHG&CD hnena silai an hman lai reng, la tha tak tak an pe chu thil lawmawm tak leh chhinchhiahtlak tak a nih thu sawiin, “Hun eng emaw chen atang tawh khan MRHG&CD hnena silai hlan hi a tul tihna a awm tawh a; amaherawhchu, sorkar kalphung dan leh hrai zawm a ngaih thin avangin kan beisei aiin hun a duh rei a ni,” a ti.
An hman lai aia tha zawk silai an neih chuan MRHG&CD-te pawhin inrintawkna, phurna leh thathona a pek ngei a beisei thu a sawi bawk a ni.