Aizawl : MZP buatsaih, ni hnih awh tur thu leh hla kutpui chu nimin khan Vanapa hall, Aizawlah Minister of state Dr. K. Beichhua-a’n a hawng a. School Education Minister Lalchhandama Ralte-in chawhnu lam hun a hmanpui bawk.
Thu leh hla kutpui tan ni ah hian ziakmi – Revd Chuauṭhuama, C. Chhuanvawra, Lalhriata, Zirsangkima, R Lalrawna, B Lalhriattira leh Lalrammawia Ngente-te kawmna hun hman niin, Arini leh Rinhlui Tlumang te an zai a. Vawiinah ziakmi Zari, C. Lalnunchanga, Prof. RL Thanmawia leh B. Lalthangliana te kawmna hun hman leh a ni ang a, Angaihtei, Marina Varte, Lalremruati leh Saiwanah & Omom-i te an zai bakah MAL book of the year dawng tawhte chawimawi an ni ang.
MZP buatsaih thu leh hla kutpui ah hian ziaktu hrang hrang te kutchhuak lehkhabu hrang hrang a duh tana lei theih tura chhawpchhuah a ni a. He kutpuiah hian college leh sikul hrang hrang zirlaite an tel a ni.