Karlehah tun tennis season kal lai a Grans Slam tournament hnuhnung ber US Open khelh a ni tawh dawn a, mipa tennis player player langsar kan hmu thei ang em tih a chiang lo.
World number two Alexander Zverev chuan a tel theih loh tur a tichiang tawh a. French Open semi-final a Rafael Nadal nen an inkhelh tuma a kheimit tha a tihnat chu a la dam chiang lova, hei vang hian a inkhel thei dawn lo.
Kum 25 mi hi June thla tir khan a hliam hi zai a ni a. A hliam hi chawlh rei ngai leh dam hma a nih loh avangin New York a inelnaah hian tel thei lo tura ngaih sa a ni a. 2020 US Open runner-up hian Thawhtanni zan khan a tel loh tur hi a tichiang.
Zverev a tel theih dawn loh avangin Spanish star, world number three Nadal chu seeding pek an nih hnuah seeded number 2 a ni dawn a, champion lai Russian star Daniil Medvedev hnungah a awm ang.
Nadal hian a pum lama tihrawl hliam a neih avangin Wimbledon hnuah vawikhat chiah a la hmachhawn a. Kar hmasa khan Cincinnati Open-ah inkhelin a tlawm nghal.
Djokovic pawh?
Grand Slam title inlak hnem lama inum mek zinga tel Serbian star Novak Djokovic chuan US Open hi a khel thei dawn em tih zawhna a la lian hle.
Wimbledon champion lai hi Grand Slam title 21 la tawh a ni a, pakhatin Nadal hi a la pha lo.
Covid 19 vaccine lak a duh loh avangin Melbourne-ah kumin khan Australian Open a khel thei lo tawh a. US Open-ah pawh hian tun dinhmunah chuan a la khel thei dawn lo.
US Centers for Disease Control and Prevention chuan an khua leh tui ni lo Covid 19 vaccine la lo chu nikum October atang khan an ram luh a phalsak tawh lova. CDC hian August 11 khan Covid 19 restriction a neih hi thlah dul hret mahse Djokovic hian an dan a tlin ang em tih hriat a la ni lo.
US leh Canada a luh theih loh vangin Djokovic hian Indian Wells, Miami, tunhnaia Cincinnati Open leh Canada a khelh Rogers Cup te a khel thei tawh lo.