Premier League club West Ham United chuan Chelsea atangin left-back Emerson Palmieri chu Pound maktaduai 15 in an lalut dawn.
Kum 28 mi Italy international hian season liamta khan loan in French club Olympique Lyonnais tan a lo khel tawh a. Kum 2018 a AS Roma atanga Stamford Bridge a pan hnuah first team-ah hmun nghet a chang thei lo.
Emerson hian Thawhlehni khan West Ham-ah hian medical a nei fel anga, London club tho hi a zawm dawn a, tun nipui a Hammers in player an lakluh pasarihna a ni ang.
David Moyes-a pawlte hian tunhnai season hnih chhungin Premier League table chung lamah club lian zawkte elpha viau mahse tun season-ah match thum atangin point khat mah an la hmu lo mek.
Striker Gianluca Scamacca, defender Nayef Aguerd leh forward Maxwel Cornet te manto taka an lakluh bakah Flynn Downes, Thilo Kehrer leh Alphonse Areola te an lalut tawh.