Aizawl: Central YMA President R Lalngheta’n Mizo thalaite tana cement mistiri training a hawng. Training hi Mizoram Youth Commission (MYC) leh Central YMA buatsaih a ni.
Thawhelhnia Central YMA Hall, Tuikhuahtlanga training hawnna inkhawmah training tura thlanchhuahte fuihna thu sawiin R Lalngheta hian, “Hnam dang cement mistiri-te kan ram atanga kan umchhuah theihna tur chu an thawh ai kan thawh theih a, tih tak takna nen a taka hna kan thawh ve hi a ni,” tiin, hnam dang anga a chhawrtute thu ngaihchan thiam a pawimawh tih sawiin, training zawh ve leha inti-mistiri nghal lutuk lo tur leh chhel taka bul tan turin a chah.
Mizo thalaite tana cement mistiri training hawnna inkhawmah Prof Lalnuntluanga, General Secretary, Central YMA-in report a pek danin, Mizo thalai tan Central YMA-in sorkar nena tang hoa cement mistiri training hi tum 18 lai buatsaih a ni tawh a. Mi 1,350 chuang zetin training chhuak tawhin, eizawnna tak tak atana hmang mi eng emaw zat an lo awm tawh a ni.
He hun hi Lalsawma Ralte, CEC, Chairman Training & Youth Affairs Sub Committee Central YMA-in a kaihhruai a ni.
A tum 19-na atana mistiri training neih leh tur hi Mizoram sorkar hnuaia MYC nena tangkawpa Central YMA buatsaihah hian branch YMA hrang hrang atanga member training duh hming pe lutte atanga interview neiin, mi 52 thlan chhuah an ni a. Nilaini atangin Central YMA pisa-ah training neih chhunzawm nghal a ni dawn a, September 30, 2022 hian training hi khar a ni ang.
Training chhung hian stipend, DA leh chhun thingpui man pek vek an nih dawn bakah training chhuakte tan cement mistiri bungrua Rs. 2,000 hu pek vek an ni ang.