Aizawl: Aizawl Municipal Corporation chuan tha zawka AMC Building Regulation, 2012 kalpui a nih theih nan AMC hnuaia engineer, architect leh supervisor te chu nimin khan ko khawmin an mawhphurna hrang hrangte a hrilhfiah a, dan loa in sak pathum thiat tura hma lak mek a nih thu sawi lan a ni.
AMC Town Planner Lalmuanawma kaihhruaia hun hmanah hian AMC Enforcement Committee Chairman, John Zosangliana Khiangte, Councillor chuan AMC Building Regulation, 2012 tumte bakah committee hmalaknate sawiin, AMC Enforcement Committee rawtna angin AMC chuan danloa in sak pathum thiat tura hma lak mek a nih thu a sawi.
John Zosangliana Khiangte chuan enforcement committee hian chak taka hma lain dan bawhchhiatna hrang hrangte a tul angin an en zui tih leh complaint box-a lehkha lutte pawh chak takin bawhzui a nih thin thu a sawi a, vantlang tan pawha hmuh nuam lo khawpa hnawksaka in sak hmuh tur a la awm thu sawiin, AMC Building Regulation, 2012-in a tum ber, Aizawl khawpui nuam siam turin thawhpuiah kalkhawmte chu a sawm nghal bawk a ni.
Municipal Commissioner Zothanmawia pawhin thu sawiin, AMC huam chhungah hre reng chunga dan bawhchhiatna a thleng fo nia a hriat thu a sawi a, “Inhmun, kum tam tak kaltaa kan lo neih tawhte hi a tê si a, in kan duh lian tawlh tawlh bawk si a, chu chuan harsatna tam tak a thlen a ni,” a ti.
Aizawl khawpui chhunga building regulation kalpui danah duhkhawp lohna tam tak awm bawk mah se National Disaster Management Authority (NDMA) chuan Aizawl hi hma la hmasa leh hma la tha zinga min dah thu sawiin, chutihrualin dan kengkawh chungchangah hian AMC leh a thawhpui engineer leh architect ten mawhphurna an hlen a pawimawhzia leh an mawhphurna hrang hrangte a sawi.
He hunah hian councillor pahnih, Rosiamngheta leh Chuauzikpuii bakah official dangte an tel bawk.