Brooklyn Nets superstar Kevin Durant chuan chhuah a dil a, hun engemaw chen chhung a chhuahna tura a team a kar hnuah a chhuak dawn lova, player leh team ten an thawhho zelna turin inbiakremna an nei tih Nets general manager Sean Marks chuan a sawi.
Marks chuan, “Coach Steve Nash leh kei bakah Nets hotu pahnih Joe Tsai leh Clara Wu Tsai te hovin Kevin Durant leh a thawhpui Rich Kleiman te Los Angeles-ah kan thukhawm a. Hetah hian kan thawhhona chhunzawm a, basketball a hlawhtlin tum a bei zel turin kan inbe rem. Kan zavaiin tum pakhat kan nei a, chu chu Brooklyn-ah hian team tha tak, championship hawn ngei tur team din a ni.” tiin a sawi.
Chiang zawkin
All NBA First Team a vawi ruk lang pha tawh Durant hian NBA June 30 khan Nets hnenah hian trade a chhuahtir turin dilna a thehlut a. Tun thla tir pawh khan Joe Tsai nen hian inbiakna neiin chhuah a duh thu a hriat nawn tir leh.
Hemi tum hian Durant chuan an coach Nash leh an GM Marks te chu an that tawk danah a ring zo lo nia sawiselin Nash leh Marks nge amah thlang zawk turin Tsai hnenah hian a sawi.
Nimahsela tuna an inbiakrem hnuah Nash leh Marks te hian an hna ngai an chhunzawm dawn a. Durant pawhin kumin atanga hman tan tur nikum a kum li daih Dollar maktaduai 198 man contract pawhseina a ziah chu Nets hnenah hian a hmang tan ang.
Nets hian Durant hi chhuahtir an tum lo tawp a ni lova, NBA team dangte hnen atangin dawrna ngaihthlak pawh an inpeih. Chutihrualin Durant nena inthleng turin a hlutna an dahsan avangin an beisei hnem a. Team tinin Durant duh vek mahse a hlutna ang tluk thei tura Nets hnena pek let tura tha tawk duan an inhuam lo.
Nets hian tun nipuiah star player dang Kyrie Irving pawh chhuahtir tumin trade turin an inhawng a, ani pawh tun thlengin a la chhuak lo. Chutihrualin Cleveland Cavaliers a a lo champion pui tawh LeBron James-a khelhna Los Angeles Lakers chuan an ngaihven mek.