Phalna nei lo tan lirthei khalh mai mai a rem lo lehzual dawn
Lirthei khalh fimkhur a ngai chho hle dawn a, phalna nei lova lirthei khalh leh kumtling lo lirthei khalh hremna pawh a na sawt hle. Hei hi thla thar (September) ni khat atanga hman tan tur a ni a, sorkar laipui thuchhuak a ni bawk.
Motor Vehicles (Amendment) Act 2019 hman tan a nih tur chungchangah KT Beicho chuan thawhtanni khan Transport Department Conference Hall-ah thuthar thehdarhtute a kawm a, “Sorkar pawisa neih loh vanga dan hi hmang tur kan ni lo a, sorkar laipui thupek vang zawk a ni,” a ti.
Dan siam that hman tur chungchang sawifiah nghalin, “Sorkar laipui chuan August, 2019 khan Motor Vehicles Act siam that hi September 1, 2019-a hman tan turin Gazette Notification a lo tichhuak tawh,” a ti a, he dan thara dan bawhchhiate sum chawi tur chu a san deuh avangin mipui tan phurrit a nih hlauhna avangin Mizoram sorkara transport department chuan fine hi tihniam tura hma a lo lak tawh thu a sawi.
He sorkar laipui dan thar hi a khauh em avangin state-ah chuan hman mai a ni ta lo a, mahse tuna hman an tum tak nachhan chu sorkar laipui atanga nawrna a nat tawh vang a nih thu Commissioner & Secretary, Transpaort department hian a sawi bawk a ni. I fimkhur zual sauh teh ang u.