Kerala-a chhungkaw nu/pi ber thlahna hnuhnunga a tu leh faten hlim hmel taka thla an lakna chu social media-ah a darh a, sawi a hlawh zui hle.
Thla lak hi kar hmasaa Malapally khua, Pathanathitta district-a pitar kum 95 mi, Mariyamma-i thlahnaa an lak niin Times of India chuan a tar lang.
Mariyamma-i hi August 17-a thi kha a ni a. A hun hnuhnungah hian a chhungte, mi 40 vel chuan a ruang (kuang) kilin hlim hmel takin an nui hlawm a. Social media-a a darh hnuah lusun laia hlim taka nuih a ni chu sawi a hlawh ta hle a ni.
A kum a tam tawh avang leh a hriselna tlahniam zel avangin Mariyamma-i hi kum eng emaw ti chhung chu khuma mu tawp a ni tawh a. Fa pakua neiin tu pawh 19 zet a nei a, a tu leh fate hi khawvel hmun hrang hrangah an awm darh hlawm tawh a, a thih hian a thei thei an haw khawm niin chanchinbu chuan a tar lang.
An chhungkaw thlalak a darh hnuah an chhungte zinga mi, Babu Umman chuan Mariyamma-i chu hlim takin kum 95 a dam a, a tu leh fate a hmangaih em em niin a sawi a. An thlalak chu a hova an khawsakho lai hriat reng nana an lak a nih thu a sawi.
Thla hi Zirtawpni zing dar 2.15 vel, a thlahna tawngtaina hman zawh hnua lak a ni.
“He thlalak hre thiam lo hi chu thih hnuah mittui a far thin tih hria chauh an ni ang. Thihna hi hlim taka chawlhna a ni a, chutiang chuan keini chuan kan ti a ni,” tiin an chhungte dang, Mathrubhumi chuan sawiin miin an lo sawi danah engmah buaina an nei lo tih a sawi.
Thlalak hi Kerala Education Minister V Sivankutty meuh pawhin a sawi chhuak a. “Thihna hi a na a; mahse, inthlahna a ni a. Chatuana hlim taka kan nun tawh zawkna tur atana lawm taka inthlah aia tha eng nge awm chuang? He thlalak hi a chhe zawnga sawi a tul lo,” tiin Facebook-ah a tar lang.
Facebook-ah mi thenkhat chuan he mite chhungkua dem zawng hian an tar lang hlawm a, thenkhat erawh chuan dik lo engmah a awm lo nia an ngaih thu an sawi ve bawk.