India chuan March thlaa ‘tihpalh thila Pakistan-a missile kaptu’ air force officer pathum chu a bân.
He thil thleng hian nuclear ralthuam nei ram pahnihte hi nasa takin a ineptir phah a ni.
Delhi chuan ‘a pawi tak zet’ tih a sawi a, tih dan thin pangngaia a enkawl hna an thawhnaah ‘technical thil fel lo vanga thleng’ niin a sawi.
Islamabad pawhin Delhi hnenah ‘fimkhur loh thil avanga thleng hi inthlahdah vang’ a nih thu hrilhin thleng nawn tawh lo se a ti nghal.
Indian Air Force chuan Thawhlehni khan March thleng thlenga inhnamhnawih officer pathum chu an hna atangin an bântir tih an puang.
Thil thleng an chhuinaah heng officer-te hian tih dan tur pangngai bak thil tiin hei hian BrahMos missile hi a kap chhuak palh ta tih an sawi.
BrahMos hi nuclear ralthuam keng thei cruise missile niin Russia leh India tangdunin an siam a ni.
Pakistan-a air force chuan missile hi Mach 3 (ri kal chak zawng let thum)-a chakin lei atanga metre 12,000-a sangah a thlawk a, Pakistan ram chhungah km 124-a thui thlawkin a tla zui niin an sawi a ni.
Sipaiin thuchhuah an siamah chuan missile hian ‘Indian leh Pakistani chung boruaka passenger leh international flight tam tak a tiderthawng’ tih tar langin, ‘lei lama mihring leh hmunhma tan pawh a hlauhawm hle’ an ti.
Indian Defence Minister Rajnath Singh chuan he thil thlen hnu lawkah hian India chuan a ralthuam ‘himna leh vawnhimna’ chu a ngaih pawimawh thil a nih thu leh reilo te hnuah chhui zawha fel lo a awm chuan hmuh chhuah thuai a nih tur thu a sawi.
India leh Pakistan ram hnih hian hun rei tak ata tawh inkar khi an nei tawh a, Kashmir chu anmahni chan ve veah an chhal a; mahse, tlem ve ve chauh an chang thung.
Tun hmain helai bawr avang hian an lo indo tawh a, Delhi chuan a thenawm ram hian Kashmir-a inlak hran tuma helho a thlawp niin a puh a, Islamabad chuan a pha nasa hle thung.