Aizawl : Lengteng bialtu MLA L. Thangmawia’n nimin khan a bial chhunga Kawlkulh by-pass road laih mek, Kawlkulh PHC X-Ray khawl thar bun, Kawlkulh field no 2 tur laih mek, Kawlkulh MHIP building sak mek, DBL company hnena CSR fund a dilsak Rs nuai 6 hmanga Puilo khuaa Health clinic centre sak mek te a tlawh a, MLA fund hmanga Kawlkulh town hall-a Babminton court carpet phah dan tur a enpui bawk.
L Thangmawia chuan Chief Minister Zoramthanga’n Kawlkulh by-pass road laihna tur sum a ruahmansak avanga lawmawm a tih thu sawiin, tun thal chhunga a tam thei ang ber hna thawh a nih theih nan mipuite chu hnathawktute lo tawiawm turin a ngen a. Compensation tur sum a awm loh laia mahni hmun leh hma, vantlang tana phal taka petute chungah lawmthu a sawi.
Anusha Project Pvt. Ltd. (APPL)-in a ngenna ngaipawimawha CSR fund atanga X-Ray khawl changkang tak, Kawlkulh PHC tana an leisak, tuna hman theih tura peih a ni ta pawh lawmawm a tih thu sawiin, a hmang tangkai tur Kawlkulh leh a chhehvel mipuite a lawmpui thu a sawi a. Dulte khua pawh tlawhin, Dulte hall sakna tur Rs nuai 418 Central-ah dil mek a nih thu sawiin, Dulte YMA hnenah Oxygen concentrator a pe bawk.
Lengteng bialtu MLA chuan a bial chhunga Health sub-centre la awmlohna khaw pali – Vankal, Puilo, Changzawl leh Hrianghmun-ah te Health department-in Health clinic centre a dah thar sak vek a vangin lawmthu a sawi a. Heng zinga khaw pahnih – Hrianghmun leh Changzawla Health Clinic centre building tur chu MLA fund leh fund dang hmanga sak zawh tawh a nih thu leh Puilo leh Vankala sak mek pawh kumin chhung ngeia zawh hman tum a nih thu a sawi bawk a ni.