Mizoram a club football inelna sang Mizoram Premier League chu thla thar atangin khelh a ni leh dawn a. September 1 hian kickoff a ni ang.
Tun tum hi Mizoram Premier League season 9-na niin Zote Honda chu main sponsor an ni ang. Covid 19 hripui avanga kum hnih chawlh a nih hnuah club football inelna ngaihhlut khelh a ni leh dawn a. Club hrang hrangte an inbuatsaih nasa tawh.
Zonet Cable TV Pvt. Ltd. chuan TV leh an platform dangah Live in an pe chhuak leh dawn a. Club lamte pawhin senso a tlem zawk nan salary cap an kalpui dawn.
Kick Off chu
Mizoram Premier League Board chu Nilaini khan thukhawmin Kick Off hun hi Dawrpui Multipurpose Hall ah hman a ni dawn a. September 8-ah khelh tan tura ruahman a ni.
MPL 9 ah hian MFA thawhpui Nivia siam – ‘Nivia Dominator 3.0’ chu official ball a hman a ni dawn.
Kum 2012-13 a MPL bultan a nih kumah Dinthar FC chu champion hmasa berin, a hnuah Aizawl FC chu vawi li an champion tawh a, champion ngun ber an la ni.
Chanmari FC chu vawi hnih an champion tawh a, Chhinga Veng FC chu vawikhat an champion tawh bawk.
League inrualkhai
Covid 19 hripui avangin football a chawl a, hripui nghawng sum hloh a tam avangin club te pawhin an tuar a, league han tharthawh leh a awlsam lo.
Club hrang hrangten inremna neiin tun season-ah club lam tana a hautak lutuk loh nan leh inelna inrualkhai zawk a awm theih nan club pakhatin season khatah coach leh player te tan cheng nuai 10 bak hman theih loh turin dan an siam a. Player pakhatin thla khatah Rs. 15,000 aia tam an hlawh thei dawn lo.
MPL club te chuan an thutlukna chu Mizoram Premier League in hma a sawn zel nan leh state league tlo zawk leh daih rei zawk, innghahna tur kalphung mumal taka hmalam pan pui theih tur an neih theihna tur a nih thu an sawi tel a. Tun season chhung bik atan a nih thu an sawi bawk.
Kumin MPL ah hian champion lai Aizawl FC, Chanmari FC, Chawnpui FC, Electric Veng FC, Chhinga Veng FC, FC Bethlehem, FC Venghnuai leh Mizoram Police FC te an inel dawn a, team tinte an inbuatsaih nasa tawh.
Club football tan hma in Mizoram pum huap football inelna lian Inter Village Tournament buatsaih a ni a. Hei hian football boruak vaw thovin player tha te inpholanna hun a siamsak.
MPL club-te pawhin remchang an la a. Transfer window inhawn chhungin tualchhung player tha zawn nan an hmang. Inter Village a che tha player bakah state pawn a khel professional football a tawnhriat nei tam tawh player-te an lakluh an awm nual.