India leh Japan chuan defence leh foreign minister inkawmna, 2+2 dialogue vawi hnihna chu September 8 hian Tokyo khawpuiah an nei dawn a, hetah hian sipai nunchan zirhona leh ralthuam siamna lama thawhhona chu an sawi tur langsar a ni ang.
Meeting hi Prime Minister Narendra Modi-a’n Japan a tlawh hma lawka neih tur niin September 27-a prime minister hlui, Shinzo Abe-a sorkarin a vuinaah a tel dawn niin Nilaini khan sawi a ni.
Modi-a’n Japan a tlawh tur leh hruaitute a kawm dawn em tih chungchangah ram pahnih chuan thuchhuah an la nei lo.
Japanese-te chuan 2+2 dialogue hi kumtir lama neih tur khan an lo nawr tawh a. Defence Minister Rajnath Singh leh External Affairs Minister S Jaishankar te leh Japan lama Yasukazu Hamada leh Yoshimasa Hayashi an inbe dawn a. Ram pahnih thawhho zelna tur kawng hrang hrang – ram venhimna, technology leh sipai nunchan zirho an sawi dawn tih India sorkara thuneitu sangte chuan an sawi.
India leh Japan hian an sipaite ve ve mamawh inpek tawn leh inpawh tawn theihna tura inremna an lo siam tawh a, 2+2 meeting-ah hian hemi tihpuitlin dan turah rem an ruat dawn nia sawi a ni.
Japan-a Self-Defense Forces Acquisition & Cross-Servicing Agreement (ACSA) leh India sipai inremna hi September, 2020 khan ziah a ni.
Tun tuma inkawm tur hi an chhehvela venhimna lam thil thleng mek, China-in Line of Actual Control (LAC) an hnaih thin bakah South China Sea leh East China Sea-a an sipai an chettlattir dan chungchang pawh sawihona remchang a ni thei dawn bawk a ni.