- Ruata
Toyota company chuan Multipurpose Vehicle (MPV) huanga an lirthei lar leh hralh tam Innova chu a thar – Innova Hycross tih hmingpuin tihchhuah an tum a, hei hi tun Diwali lo awm tur chho, November thla bawrah a nih beisei a ni.
Report thenkhatin an tarlan danin lei theih tura tlangzarh chu January, 2023 bawrah a nih hmel a. Tuna chhuak mek Toyota Innova Crysta pawh a la chhuak zel ang a, market lamah Toyota lirthei a rawn tam belh dawn tihna a ni. Toyota chuan a hmaa an lo phochhuah tawh Urban Cruiser Hyryder chu reiloteah an tlangzarh famkim dawn a, Innova Hycross hian a zui dawn niin a lang a. Hycross bik hi global model an tih, khawvel huapa hralhchhuah tur a ni dawn a, market dang, Indonesia -ah leh hmun dang dangah pawh hralhchhuah a ni dawn a ni.
Toyota Innova Hycross hi khawvel hmundangah chuan Innova Zenix tih hmingpuin an hralh dawn tih report thenkhat chuan an tarlang a. Thuchiang tak a company lam atang chuan puanzar a la awm lemlo a, reiloteah thuchiang zawk te pawh kan la hria ang a.
Khawvel huapa company tha leh rintlak Toyota atangin lirthei thar tha tak tak kan hmu chho dawn tih erawh a chiang a, hei hi India rama lirthei leitute tan chuan thu lawmawm tak a ni awm e.
Toyota Innova hi hun rei tak ata tawh MPV huangah chuan lirthei tha leh hralh kal tak mai a ni a. India ram pum anga thlir pawhin sorkar, mimal leh khualzin te tana hman nasat lirthei chuan nuam leh changkang bawk si a ni a. Sorkar mi pawimawh phurhna atan pawh India rama state hrang hrang sorkar ten an hman uar tak a ni a. Mizoramah ngei pawh he lirthei hi hman nasat a ni tawh viau a ni.
Innova Hycross chu le
Toyota Innova chhuak reng reng hi SUV puitlinga chhiar te hoin an neih ang ladder frame chassis hmang vek an la ni a. Innnova Hycross-ah thung chuan hei hi a hmang tawh dawn lo a. Hei hi a lirthei tih zan nana tih a nih mai bakah company lam chuan monocoque platform tunlai zawk dah an duh tawh vang niin a lang a ni. A hmaa a hnunglam differential hmanga a ke hnunglam phih kal ni thin pawh he lirthei thar turah hi chuan drive shaft hmanga a ke hma phih kal a ni tawh dawn bawk a ni.
Heti a nih chuan tunhnaia lirthei chhuak tam bera kan hmuh ang a ni chho dawn niin a lang a, company in uluk taka an zirchian hnua an hmalakna leh an tihdanglam a nih avangin a tha viau tura beisei a ni a. Toyota modular TNGA-C platform nghahchhana rawn duan a ni tawh dawn a, hei hi kan Chief Minister te pawhin an lo hman tawh Toyota Corolla sedan car nalh tak lirthei chhuak mek platform ang a ni dawn.
A design lamah chuan tuna Innova Crysta chhuak mek nen a inang viau dawn a. Hetihrual hian lirthei thar a nihna angin design lamah tlem tlem thlak danglam a awm dawn a, tlema lang tunlai lehzual turin a design thenkhat tihdanglam a ni ang a, khawvel hmundanga chhuak mek Toyota Corolla Cross design ang deuh a ni dawn a ni. Innova thar tur Hycross hi metre 4.7 a sei a ni ang a, a wheelbase pawh 2,850mm a thui a ni dawn a, tuna chhuak mek Innova Crysta aiin a sei hret dawn a. A chhung zau nuam leh changkang tak a rawn ni bawk dawn a ni.
A khawl lamah chuan he model thar tur bikah hian diesel khawl a awm dawn lo a, petrol-hybrid chauh duhthlan tur a awm tawh dawn thung a. Hei hi tunhnaia an phochhuah thar leh an tlangzarh mai tur Toyota Hyryder SUV in a hman ang configuration a ni dawn a ni. A khawl erawh 2.0 litre a ni thung dawn a, Hyryder 1.5 litre khawl aiin a lianin a chak hret dawn tihna a ni.