Aizawl: Meghalaya khawpui, Shillong-ah awmze nei zawka state pawna Mizo thar dragon fruit hralh theih a nih leh nih loh enchhinin an sawngbawl tan.
Hemi atan hian Nilaini khan Mizoram Dragon Fruit Association (MIDFA), Kolasib hruaituten Agriculture Dept, Meghalaya, Shillong hnuaia Directorate of Food Processing hmalak dan enin an tlawh a. Mizorama thar sample an ken chu a enchhin nan an sawngbawl tan a ni.
MIDFA hruaitute hian Pastila Mukhim, Deputy Director, Horticulture Meghalaya, Shillong ruahmannain Shillong-a enterpreneur hrang hrangin food processing-a hma an lak dan an en bawk a, dragon fruit sawngbawl kawnga hma lakho dan tur an sawiho.
Food processing centre an tlawha lo dawngsawngtu, M Defenderson Sadap, Assistant Director, Horticulture (food processing) chuan food processing an kalpui dan te, kum 1955 vel atang khan Meghalaya chhunga thei hrang hrang an sawngbawl thin thu te, an siam chhuah – jam, thei tui, jelly leh a tin-te chu state chhunga an hralh thin thu leh tluang taka an la kalpui thu te, food processing lama tui mite training an pek thin thu te a lo hrilh.
MIDFA hruaitute hian Meghalaya sorkara Horticulture department hotu – Vanlalchhuanawmi Renthlei, Jt. Director leh Mukhim bakah C.Zosangliana, DHO, Kolasib te hmalakpui nain Shillong-a Food Processing Centre hi an tlawh a ni.