China chhimthlang lam province-te chu khaw lum uchuak takin a tuam mek hlawm a, hmun thenkhatah chuan a lum ber tum an tawng hlawm a, 40°C chung lam a ni hlawm.
Chongqing leh a thenawm, Sichuan-a chengte chuan khaw lum lutuk hi lei hnuaia tawmna an siam, underground bunker leh puka thingpui dawrah an tlanchhiatsan hlawm.
Mi thiam thenkhat chuan tuna khaw lum uchuak tak hi khawvel chanchina a na ber a nih theih hial thu an sawi.
Khaw lum uchuak tak bakah hian China hian khawkheng na tak an tuar mek bawk.
Province pahnihah hian rel station-a an êng chhitte chu electric renchem nan an tihniam (dim) hlawm a; social media-a thlalak leh video thehdarhah chuan Chongqing-a mite chu rel pindan thim reih ruiha an chuang lai leh kawtthler thim taka an kal laite a lang.
Power renchem nan hian Sichuan-a sorkar pisate chu an air condition pawh 26°C aia hniama dah lo tura tih an ni a, Chongqing thuneitute pawhin industrial firm-te pawh Ningani thleng an thil siamna hmunah hmang rih lo turin an ti.
Hetiang a nih avang hian company thenkhat chuan an pisa vawn daih nan a chhunga vur tlang lian tak an hung tawp nia sawi a ni.
Pisa pawn lamah thung chuan zanriah pawh khaw lum lutuk tlanchhiatsanin lei hnuaia chawlhna awm ang anga an ei nasa hle thung.
‘Cave hotpot’ thingpui dawrte hi nipui hunah an lun thin hrim hrim a. Tun lai erawh chuan khawlai a lum uchuak em avangin mi zawng zawngin an pan a ni deuh ber rih a ni.
Cave hotpot thingpui dawr pakhat chu 16°C chauh a ni a, pawn lam erawh chu 42°C la a ni thung niin sorkar chanchin, China Daily chuan Inrinni khan a tar lang.
Thingpui dawra chawl kher lote pawh leiverhah an awm nasa a, puan phahin mut pawh an mu mai hlawm.
Lo neitute thlai thar pawhin khaw lum uchuak leh khawkheng hi a tuar nasa hle.
Video darh pakhatah chuan Sichuan-a ar vulhtu pakhat chu ni lenga khua a lum hnua zan lama zankhuaa power an neih loh avangin a ar vulh zawng zawng an thih vek avanga a tap pawh hmuh tur a awm.
An rama hydropower siam chhuak tam ber, Sichuan-ah hian Ningani zan khan zankhuain ruah a sur a, mi 30,000 vel hmun himah suan chhuah ngaiin an awm niin sorkar broadcaster CCTV chuan a tar lang a. Hei hian tlema an dinhmun a tihziaawm beisei a ni.