Premier League club Newcastle United chuan tlarhma a rinrawl ni tur thar an nei dawn a, an club chanchin a player manto ber ni turin Pound maktaduai 60 in Real Sociedad striker Alexander Isak an lalut dawn.
Kum 22 mi Sweden international hi Saudi sum hmanga lei Magpies in an tlarhma a innghahna a nih an beisei a. Striker hriam Callum Wilson nei mahse inhliam avanga chhawr theih loh a nih ngun avangin mi thar lakluh an duh. Wilson hi Manchester City laka goal khung tuma an inkhel zawhah a malpui hliam nat zawng endik ngaiin a awm leh tawh.
Borussia Dortmund striker hlui hian kum 2019 khan Real Sociedad hi a pan a. An tan vawi 132 inkhel tawhin goal 44 a khung tawh. Ram tan vawi 37 inkhel tawh bawkin goal 9 a khung tawh bawk.
Newcastle United chanchin a player manto ber ni lai chu Joelinton a ni a. Kum 2019 khan Brazilian striker hi German club Hoffenheim atangin an lalut a. Nimahsela Tyneside-ah beisei anga hun a hman loh hnuah midfielder anga chhawr a ni a. Season liamta khan an midfielder pawimawh ber zingah a tel.
Saudi sum hmanga khawvela club hausa ber zing ami ni mek Magpies hian pawisa hman an fimkhur a, chutihrualin sum hman nat an inhuam. January thla khan Pound maktaduai 35 in Brazilian midfielder Bruno Guimaraes an lo lalut tawh.
Isak hi an lalut a nih erawh chuan an pawisa hman zat a pung hle dawn a. Tun nipuiah Pound maktaduai 110 vel bawrin Matt Targett, Sven Botman leh Nick Pope te an lalut tawh.