Aizawl: Kumin thla riat chhungin Mizoramah ruihhlo vanga thi mi 23 an awm tawh a, an zinga mi 22 chu mipa an ni a; heroin kaihhnawiha thi deuh vek an ni.
Excise & Narcotics department chhinchhiah danin January atanga August 24 thlenga ruihhlo vanga nunna chân zinga mi pasarihte chu heroin vanga thi an ni a, a bak mi 13-te pawhin heroin leh ruihhlo dang an ti kawp thin a, ‘heroin vanga nunna chân’ tiin a sawi theih.
Kumina ruihhlo vanga thi mi 23 zinga mi 22-te chu mipa an ni a, hmeichhe pakhat chu ruihhlo vangin a thi bawk.
Kum 1984 atanga kumin August thla thlenga ruihhlo vanga Mizorama thi zat chu mi 1,716 an ni a, mipa 1,514 leh hmeichhia 202 an ni.
Mi 1,716 zingah hian parvon spas/proxyvon vanga thi an tam ber a, mi 1,161 an thi a. Kum 34 chhunga ruihhlo an thihpui tam ber chu parvon spas/proxyvon niin a dawttu chu heroin a ni a, kum 38 chhunga heroin vanga thi zat chu 221 an ni a, ruihhlo dang thihpui hi 334 an awm bawk.
Excise & Narcotics department chhinchhiah danin parvon spas/proxyvon thihpui hi kum 1990 atang khan an awm tan a, an tam ber kum chu 2003 kha niin mi 133 an thi a, hetih lai hian kum 2017 atang khan thihpui an awm tawh lo.
Heroin thihpui hi kum 1984 atang khan an awm tan a, thi an tam ber kum chu 2016 kha niin mi 36-in an thihpui a, a kum telin an pung tual tual niin chhinchhiah a ni.
Excise & Narcotics department chhinchhiah danin, kum 34 chhunga damdawi hman sual vanga thihna thlen tam ber kum chu 2004 kha a ni a, mi 143 an thi a, mipa 122 leh hmeichhia 21 an ni.