Aizawl : Champhai town sanitation task force chu nimin khan an Chairman Champhai Bawrhsap James Lalrinchhana hovin an thukhawm a. Khawpui fai inelna leh swachh survekshan chungchanga hmalak dan tur te an sawiho.
Veng chhung faina leh hmasawnna turin village level cleanliness committee, YMA leh kohhrante hrang hrangte an huamchhungah theuh theihtawp chhuah tura committee hminga ngen ni se, an ti a. Sorkar department-te pawh an hmunhmate enkawl fai theuh tura an beisei thu an sawi.
Faina kawnga veng hrang hranga hmalaknate endik thintu tur Champhai town sanitation task force monitoring team din an rawt a, road protection squad nen a tul anga endik leh mipui zirtir hna kalpui an rawt bawk.
Neutral zone hrang hrangte tifai turin school-te ambassador-a ruatin, zirlaite thinlungah fai nih duhna tuh a nih theih nan inelna siama, mipuite hnena faina chungchang inzirtirna huapzau zawka kalpui pawh an rawt a. Khawpui fai inelna tehfung hrang hrangte VC leh YMA hnenah chiang zawka hrilhhriat ni se, tiin September chhungin faina hnatlangpui koh ni se, an ti.
Hman khat daih plastic (single use plastic) hmang tlem tura tanlak tulnate bakah bawlhhlawh sakhat sawngbawlna -solid waste management- kalpuina tura hmalak tul te, bawlhhlawh khawn khawm, tawih thei leh theilo thliarhran, hnawm atanga thil tangkai leh hlu zawk siam chhuah chungchangte, public private partnership (PPP) mode-a solid waste management kalpui a nih theih dan turte bakah vantlang zun in leh ek in felfai zawka enkawl dan turte an sawiho bawk.