Formula 1 in nipui chawlh a hman hnuah season kallai a chhunzawm leh tawh dawn a. Naktuk zanah Belgium a intlansiak turah world champion lai leh championship hmahruaitu Max Verstappen leh a elpui Charles Leclerc te chu a hnung atangin an tlan tan dawn.
Red Bull car khalhtu Verstappen leh Ferrari driver Leclerc te hian an car-ah power unit thar leh gearbox thar te an hmang dawn a. F1 dan in a part thar hman a phalsak chin an pelh tawh avangin hremna an tawrh a ngai. Anni bakah hian driver pali dang – Esteban Ocon, Lando Norris, Valtteri Bottas leh Mick Schumacher te pawh hrem an ni ang.
Driver paruk in hremna an hmuh avang hian Verstappen leh Leclerc te hi 15-na atanga intlansiak bul la tan thei erawh an ni a. Hei hi zanin qualifying a an tlan chak dan a zir a thliar a ni ang.
F1 danah hian car part thar hman phal zat pelh avanga hremna inpek danah an hman tam dan a zirin ‘5-place penalty’ emaw ‘10-place penalty’ te pek an ni thin. Nimahsela driver-te hian hremna avanga ‘track position’ an hloh hi 20 chuang a tlin tawh chuan ‘back of grid’ penalty dawngin a hnung ber atanga bul an tan tawp a ngai thin.