Aizawl khawpui bawlhhlawh tawih thei tlingkhawm atanga AMC-in lei tha an siam zawrhna tur dawr chu nmimin khan Aizawl Mayor Lalrinenga Sailo-in a hawng a, a duh apiang tan AMC Office hnuaia dawr hawn takah hian lei theih nghal a ni.
Dawr hawnna inkhawm, Municipal Commissioner Zothanmawia kaihhruaiah hian Lalrinenga Sailo chuan AMC-in bawlhhlawh tawih thei atanga lei tha a siamte hralh chhuah theih a ni ta chu Mizoram pum tan hmasawnna nia a hriat thu leh Aizawl-in a tih theih chu mi dangin awlsam takin an lo zir thei dawn tih a sawi.
Bawlhlawh sawngbawlna hmun, Tuirial-a Waste Management Centre chungchang sawi zawmin, helai hmun hi January thla tawpah SIPMIU hnen atangin AMC-in an lak chhawn thu leh sum leh pai a ken tel loh avangin AMC pawisain an enkawl zui tih a sawi a, “Aizawl bawlhhlawh hi a tam tawh em avangin waste management centre pakhat chauh hian a dawl zo tawh lo va, AMC-in sum leh pai a ngah bawk si loh avangin sorkar tanpuina pawh kan mamawh zel dawn a ni,” a ti.
AMC-a solid waste management changtu, Executive Councillor Laltlanzova Khiangte pawhin thu a sawi a, bawlhhlawh atanga lei tha siam chu thil namai lo tak, India ram municipal tam takin an la tih ve theih loh a nih thu sawiin, waste management hi tanrual ngai tak a ni a, ram hruaitute nena an tanrual theih chuan plastic paih mai mai turte pawh hi kawngpui siam nana an hman nite pawh a la thlen a beisei tih a sawi.
AMC hian lei tha siam tur hian firm pakhat, Waste Tech & Bio Energy an thawhpui a. Kg 15 bag leh kg 25 bag a awm a, mipui hnenah kg-ah Rs. 10 hisapa hralh chhuah tura ruahman a ni.