California-ah chuan kum 2035 atangin petrol chauh hmang lirthei hralh chhuah a titawp vek dawn a, hei hi an state-in sik leh sa inthlak nasa lutuk a do letna tur a ni.
Dan zam thar hian lirthei siamtute chu boruak tichhe lo chi siam chhuak thuai thuai turin na lehzualin a nawr dawn a ni.
Governor Gavin Newsom chuan kum 2020 atanga tuialhthei hmang chi thilte hnualsuat turin chak zawka kal a lo tiam tawh.
Dan thar hi United States-a mihring tamna ber leh eibara sanga ber, California tan chuan thil pawimawh tak a tling.
California Air Resources Board (CARB)-in ruahmanna thar a siamah hian kum 2026-ah chuan lirthei thar zinga 35% chu electric emaw, hybrid emaw, hydrogen emaw hmang ngei a ni tawh tur a ni.
Kum 2030-ah chuan 68%-ah tipungin 2035-ah chuan a zavaiin lirthei thar chu tuialhthei hmang lo vek nihtir tawh tur a ni.
CARB chair Laine Randolph chuan an thutlukna chu ‘California tan, an thawhpui state dang leh khawvel tana chhinchhiahtlak, nakin zela boruak tichhe thei tihchhuah awm lohna tur’ a nih thu a sawi.
California-in hetiang ruahmanna an kalpui hi US sorkarin boruak tichhe thei thil tihchhuah a tihtawp hun tura a intiam aiin a hma zawk.
Mihring maktaduai 39 chuang chenna, California hi US-a mihring tam lama lian ber a ni a. Ram pakhat pawh ni se an sum thawh chhuah atang chuan khawvela economy lian ber pangana ni phak tur a ni a, United Kingdom aiin an lian ang.
Dan thar hi a taka an hman hmain US sorkarin an pawmpui phawt a ngai dawn a. American Fuel & Petrochemical Manufacturers trade association chuan President Joe Biden-a leh Environmental Protection Agency hnenah pawmsak rih lo turin an ngen a. Lirthei siamtu thenkhat chuan hetianga khap hmang tur chuan an inpeih hman loh an inring a ni.