Khawchhak lam atanga ruihhlo lokal thihpuitu an tam
Mizo thalaite nasa taka suattu chu ruihhlo a ni a, tih rem tumin bei ve thin mah ila, a sawt mawh viau. Vawiin thlengin he ruihhlo hian min la run a, kan thalai tam takin an la thihpui mek zel bawk.
Excise & Narcotics department chhinchhiah danin kumin January atanga August 24 thlenga ruihhlo vanga nunna chân zinga mi pasarihte chu heroin vanga thi an ni a, a bak mi 13-te pawhin heroin leh ruihhlo dang an ti kawp thin a, ‘heroin vanga nunna chân’ tiin a sawi theih. Kumina ruihhlo vanga thi mi 23 zinga mi 22-te chu mipa an ni a, hmeichhe pakhat chu ruihhlo vangin a thi bawk.
Kum em pawh a vei hmaa ruihhlo chikhat vanga heti zat thalai an han boral ringawt pawh hi a rapthlak a, hmalak theihna kawng hrang hranga hmalak a va tul em. Hetiang kan ni mek chung pawh hian ruihhlo hi man tur a awm reng a, man hman loh a awm nual bawk ang tih a rinawm bawk.
Khawchhak lam atanga lokal heng ruihhlote hi uluk zawka kan thlithlaia, kan ven hneh zual hi a va ngai em. Kan unaute tam tak rawn tlakthlakna a nih miau avangin anni lam pawh hi nasa zawkin hrilh thei ila, a tih rem dan kawng hi tun atanga kan thawh nasat lehzual a ngai a ni.